Shengjini

Shengjini – I quajtur në lashtësi Nymfeum, emri lidhet me pyllin e Zanave që gjendet mes Shëngjinit dhe Velipojës. Shëngjini njihet për plazhin e bukur të rrethuar nga pylli me pisha dhe të mbrojtur nga mali që i rri si kurorë. Duke qenë pranë rrugëve kryesore plazhi i Shëngjinit arrin të pranojë mbi 100 000 pushues në ditë. Në këtë zonë janë të vendosur disa prej restoranteve, bareve e diskotekave më të frekuntuara. Shëngjin përbën një nga resurset kryesore për turizmin në të gjithë Adriatikun lindor.

Shengjini ndodhet 8 km në Veriperendim të qytetit të Lezhës, në bregun e Adriatikut. Jul Cezari, në vepren “Lufta Civile” e permend emrin e këtij limani si Nymfeum në vitin 48 para Krishtit. Këtu erdhi Flota e Mark Antonit në fushatën e Cezarit kundër Pompeut. Emri Nymfeun lidhet me çetën e nymfave apo të zanave. Nymfeuni, është njohur në epokën romake, si një liman shumë i mbrojtur “Tutisimuss portus”. Në mesjetë ky liman njihet me emra të tjerë si Meduo. Në një hartë të shek.XIII të Pjetër Viskontit njihet madje edhe me emrin Medea. Gjatë mesjetës permendet ky liman si Portus, Medue dhe Porto di Medea.

Etimologjia e këtij emri ka mbetur ende pa u sqaruar. Sipas A.Majerit termi Medua, lidhet me emrin antik të qytetit Medeon – Meduni i sotëm, në bregun dalmat. Sipas disa dijetarëve të tjerë emri Medea është një jehonë e mitit të argonautëve dhe të princesësh Medea të Kolkitës, gjatë shtegtimit në Adriatik nga Ulqini deri në ishullin e Korfuzit. Shengjin është një kalk i emrit të shenjtorit Shën Gjini që shkurtimisht ka dhënë fjalën Shengjin. Në hartat e P.Gasparit dhe P.Coronellit, limani quhet San Giovanni di Medua. Kemi kështu një ndërthurje të një toponimi mitologjik pagan të lashtë me emrin e një shenjtori të krishterë. Pra një simbioze mendësisht mitologjike dhe fetare deri në kohën e sotme.

Related Posts