Pllana është një fshat në Njësinë Administrative të Zejmenit. Ky fshat ka qënë një qytet ilir i zhvilluar në shek VI-IV p.e.s. që hyn në 50-të qytetet e humbura ilire. Pllana sot tregon gjithçka ç’ka mbetur nga një fshat që e ka fshirë historia. Në këtë fshat të vogël dhe me mjaft kuriozitete për t’u zbuluar ruhen tradita që nuk përsëriten në asnjë zonë tjetër. Thuhet se ky qytet ilir që i përkiste Kurbinit, ishte Shufadaja (dikur port ku ankoroheshin anijet).

Gojëdhat tregojnë së në këtë fshat që shtrihet pranë lumit Mat, gjatë periudhës ilire ankoroheshin anije, pretendime që forcohen nga gjetja e një spirancë e madhe. Në Pllanë gjenden disa objekte kulti që kanë rëndësi historike ku zhvillohet edhe peligrinazh. Kisha e Shna Ndout është një vend lutjesh për shumë besimtarë gjatë 13 të martave të Shna Ndout (mars – qershor).

Në Pllanë është hapur shkolla e parë shqipe nga kisha katolike. Pranë kishës së Shen Barbaras, shekulli XIII-XIV, në kodrën e fshatit është ngritur edhe një permendore, ndërsa vetë kisha është një objekt i vizitueshëm për vlerat e saj dhe afresket e bukura që ndodhen brenda saj.

Maja e Kunorës (një majë mali mbi fshatin Pllanë) është një destinacion turistik për t’u eksploruar. “Qyteti nën shkëmb”, tunele të shumta të ndërtuara nga ushtria astro-hungareze janë një udhëtim sa tërheqës aq edhe interesant për të mësuar më shumë për rëndësinë që kishte zona.

Maja e malit është e rrafshët dhe përgjatë saj shihen disa gërmadha të godinave të ushtrisë astro-hungareze. Hyrja në tunele është e maskuar mirë, ndërsa në dalje të ndryshme do të të shfaqen horizonte të ndryshme dhe një peisazh i bukur natyror.

Dardha e egër, sherebela dhe trumza janë bimë që gjenden më së shumti gjatë këtij udhëtimi dhe janë përdorur nga banorët si bimë medicionale për efektet pozitive si pasojë e përdorimit. Fushëpamja është e bukur dhe mjaft interesante për të qënë pjesë e peisazhit në foton tuaj.