Periudha Ilire

Në juglindje të qytetit të Lezhës ngrihet maja shkëmbore e Shëlbuemit, 408 m mbi nivelin e detit. Fillimisht përmendet si një kështjellë përforcuese e sistemit mbrojtës të qytetit të Lisit. Kurora e saj ka qënë rrethuar në lashtësi prej një muri të gjatë dhe dy kulla me gurë të palatuar, duke formuar aty një kështjellë mjaft të mbrojtur.

Gërmimet arkeologjike në këtë vëndbanim kanë dhënë gjetje të shtresave kulturore përtej shekullit të 9-të p.e.s duke e bërë këtë vëndbanim parahistorik, ndër më të hershmet në Shqipëri. Akrolis vjen nga greqishtja e vjetër dhe do të thotë “Lisi i Sipërm”. Shkohet me automjet dhe në këmbë.

Qyteti antik i Lissusit është themeluar si qytet në shek. IV p.e.s. Lissus është një përbërje e mirëfilltë etimiologjike e gjuhës shqipe që vjen nga fjala “Lis”. Eshtë quajtur qyteti i 12 portave duke qënë se në terësi në gjithë qytetin antik ka 12 porta.

Lissi ishte qytet autokton ilir. Përfshin kalanë mesjetare, vendvarrimin e Heroit tonë “Gjergj Kastioti” Skënderbeu e disa objekte të tjera me vlerë historike. Muret fortifikuese të Lissit ishin më të fuqishme se ato të Apollonisë, duke bërë kështu që ky qytet i lashtë të ishte ndër më të spikaturit në botën Iliro-Epiriote e më tej.

Qyteti kishte dy porte, njëri detar, ai i “Nimfeumit”, Shëngjini i sotëm si dhe Porti Lumor, buzë Oldrinit (Drini i sotëm).

Related Posts