Reliev fushor, i rrethuar nga lumi Drin, laguna e Vainit, plazhi i Vainit dhe nga qyteti i Lezhës, e bëjnë një zonë të bukur dhe shumë interesante. Turizmi në këtë zonë është i hershëm që arriti kulmin e tij në shekullin XIX më ndërtimin e Hotelit të Gjuetisë.
Ishull-Lezha dhe këneta e Vainit pranë saj përbëjnë një kompleks natyror tërheqës për turistët ditorë të pasionuar pas natyrës dhe ushqimit të mirë.
Në dokumentet historike turko-veneciane të shek. XV përmendet shpesh Ishulli i Lezhës. Pasi qyteti i Lezhës u pushtua nga turqit me 1478 dhe qyteti u dogj, banorët e tij u zhvendosen në një zonë, jo shumë larg ne ishullin e formuar në grykderdhjen e lumit të Drinit. Ishulli i Lezhes u bë një vendbanim kryesor për lezhjanet.
Në vitet 1478-1501, për 23 vjet, Ishulli i Lezhes, ishte i vetmi vend në bregdetin e Shqipërisë së Veriut, që qëndroi i lirë, i pavarur dhe i vetëadministrueshëm.
Në Ishull Lezhë ndodhet edhe Hoteli i Gjuetarëve, ose ndryshe Vila e Kontit Çiano. Ajo ka historinë saj dhe vlera arkitekturore që i ruan ende edhe sot. E kaluara dhe tradita, vazhdon të ruhet në pjesën funksionale të rezidencës. Hoteli i Gjuetisë është projektuar nga italianët dhe u ngrit nga Konti Çiano, në vitet ’38-’39. Vila ishte vendi i preferuar i ministrit të Jashtëm të Italisë dhe projektuesit kryesor të operacioneve ushtarake, strategjike e diplomatike të Duçes.
Ai vinte së bashku me miqtë e tij dhe kalonte kohën e qëndrimit në Shqipëri. Pas çlirimit të vendit, Vila e Kontit Çiano, ka qenë vendi i preferuar edhe për udhëheqjen komuniste, që u instalua në Shqipëri pas luftës së dytë botërore, dhe diktatorin Enver Hoxha (nga historianët thuhet se në atë vend, është mbyllur dhe ka shkruar fjalimin e tij në Kongresin e I-rë të PKSH).
Natyra do të ju surprizojë ndërsa shëtisni në kopështin rreth tij. Mund të sodisni bimësi e shpend ndërsa kanatat e vjetra të dritareve, perde të thjeshta, si çarçafë të bardhë, dysheme që kërcasin teksa ecën sipër tyre, vatra guri të gdhendura, korridore dhe dhoma të viteve të para çlirimit janë gjithçka që ndodhet në këtë vend pasi këtu modernia, nuk është aspak në plan të parë. Hoteli i Gjuetisë është një ndërtesë historike shumë e bukur, gjithmonë e vlefshme për t’u vizutuar.
Në Ishull Lezhë gjendet edhe laguna e Vainit. Gjatë udhëtimit nëpër lagunë do të gjeni disa restorante shumë të njohur për gatime tradicionale apo thjeshtë peshk të freskët. Ju mund të zgjidhni të udhëtoni me bicikletë nëpër Ishull Lezhë, të shëtisni në këmbë dhe të vrojtoni zogj, të bëheni peshkatarë për të ndjerë adrenalinën e këtij sporti, të dëgjoni histori intriguese nga e shkuara ose thjesht të shijoni qendrimin.
