Fishta është pjesë e Zadrimës në Njësinë Administrative Blinisht. Ajo është e pasur me histori, kulturorë dhe elementë turistikë për t’u vizituar. Dikur njihej si një nga vendet ku burgoseshin dhe internoheshin ata që guxonin të kundërshtonin sistemin komunist në Shqipëri. 

Këngët e Zadrimës janë një pjesë e rëndësishme e muzikës folkloristike dhe gjithashtu zakonet dhe veshjet tradicionale shumëngjyrëshe janë një pasuri më vetë për etnografinë shqiptare. Ato janë një shfaqje mbresëlënëse edhe në ditët e sotme. 

Fishta është një fshat i përzgjedhur si fshat turistik. Sipas historianeve, Fishta është krijuar në vitin 1641 dhe sot ofron një peizazh mjaft të bukur. Këtu ka lindur poeti i madh At Gjergj Fishta, simboli i letërsisë shqipe. 

Ndodhet në veriperëndim të qytetit të Lezhës dhe është një zonë e rëndësishme agroturizmi me një numër të restoranteve me ushqim të ngadalshëm. Kuzhinierët kanë krijuar ushqime të shijshme me produkte lokale ndaj edhe ky fshat është më i frekuentuati kur flitet për ushqimin.

Rrënojat e ish-burgut që u hap në vitin 1967 e që më pas ka funksionuar si kamp internimi janë kthyer në punishte agroturizmi ku mund të shijohet verë e mirë dhe prodhime lokale të markuara. Fishta është kthyer në një destinacion turistik që po tërheq vëmendjen e mijëra vizitorëve vendas e të huaj.

Si të arrish në Fishtë

Përshkrohet nga rruga nacionale Lezhë – Vau Dejes dhe lidhet edhe me superstradën Lezhë – Shkodër. Largësia nga Tirana në Fishtë është 73 km ndërsa distanca nga Shkodra në Fishtë është 34 km.

Çfarë të shohësh

• Kisha e Fishtës
• 2 liqene artificiale
• Kroi Katrosh
• Kroi i Fushmollës
• Maja e Kreshtës

Ku mund të drekosh

• “Mrizi i Zanave”
• “Oazi i Fishtës”
• “Hylli i Dritës”
• “Hani i Lekës”

Si të argëtohesh

• Shëtitje në kuaj, biçikleta
• Shëtitje me kajakë në liqenin e Fishtes
• Kampingje gjatë stinës së verës
• Shëtitje në shtigjet malore të zonës, hiking,treking
• Shëtitje në shtegun e mendimit fishtjan
• Vizitë në punishten e poqerisë
• Vizito shtëpinë dhe muzeun kushtuar Fishtës

Evente

• Fundjavën e fundit të dhjetorit në këtë fshat zhvillohet panairi i gjelit të detit. Traditë e banorëve të Fishtës, e cila mbledh fermerët e zonës së Zadrimës që mbarështojnë gjelin e detit të varietetit zadrima ashtu si edhe vendi ku shtrihet zona. Zhvillohet panairi për promovimin e tyre dhe u sjell në vëmendje qytetarëve që të konsumojnë shëndetshëm dhe produkte natyrale.